1. Техникалық талдауды түсіну

Техникалық талдау дегеніміз не?

Техникалық талдау — баға динамикасы мен сауда көлемі сияқты нарықтық белсенділік туралы статистикалық деректерді талдау негізінде бағалы қағаз бағасының ықтимал қозғалысын болжау әдісі. Техникалық талдауды жақтаушылар өткен сауда деректері мен бағаның өзгеруі болашақтағы баға қозғалысының ықтимал бағытын бағалауға көмектеседі деп санайды.

Техникалық талдау үш негізгі қағидаға сүйенеді:

Нарық барлық ақпаратты ескереді

Бұл қағидаға сәйкес, акция бағасы кез келген уақытта компанияға әсер ететін барлық қолжетімді ақпаратты, соның ішінде фундаменталды факторларды да көрсетеді деп есептеледі. Техникалық талдауды жақтаушылар компанияның қаржылық көрсеткіштері, жалпы экономикалық факторлар және нарыққа қатысушылардың көңіл-күйі акция бағасында ескерілген деп санайды. Сондықтан бұл тәсілде негізгі назар аталған факторларды жеке талдауға емес, баға қозғалысын зерттеуге аударылады. Баға қозғалысы нақты акцияға деген сұраныс пен ұсыныстың өзара әрекеттесуінің нәтижесі ретінде қарастырылады.

Баға белгілі бір тренд бағытымен қозғалады

Техникалық талдауда баға қозғалысы белгілі бір трендтерге бағынады деп есептеледі. Бұл қағидаға сәйкес, тренд қалыптасқаннан кейін бағаның сол бағытта қозғалысын жалғастыру ықтималдығы оның кері бағытқа бұрылу ықтималдығынан жоғары болуы мүмкін. Техникалық талдауға негізделген көптеген сауда стратегиялары осы қағидаға сүйенеді.

Баға қозғалысы қайталануы мүмкін

Техникалық талдаудың тағы бір маңызды қағидасы — нарықтағы жағдайлар мен баға үлгілері уақыт өте келе қайталануы мүмкін деген болжам. Бұл құбылыс нарық психологиясымен түсіндіріледі: нарыққа қатысушылар ұқсас жағдайларда көбіне ұқсас реакция білдіреді. Нарық қозғалысын талдау және трендтерді анықтау үшін графикалық модельдер қолданылады. Олардың көпшілігі жүз жылдан астам уақыт бойы қолданылып келеді. Бұл модельдер нарықта белгілі бір баға үлгілері қайта кездесуі мүмкін екенін көрсетеді. Дегенмен, бұрынғы үлгілердің қайталануы болашақта бағаның дәл осылай өзгеретініне кепілдік бермейді.

Техникалық талдаудың негізгі құралдары — графиктер мен индикаторлар. Графиктер баға мен сауда көлемі туралы деректерді көрнекі түрде көрсетеді. Индикаторлар — нарық деректері негізінде есептелетін және нарық динамикасын талдауға көмектесетін құралдар. Оларды жеке-жеке қолдануға болады, алайда көптеген инвесторлар техникалық талдауды өз зерттеулерімен және басқа инвестициялық тәсілдермен ұштастырады.

Техникалық талдау және фундаменталды талдау

Техникалық талдау тарихи баға динамикасы мен сауда көлеміне басымдық берсе, фундаменталды талдау компанияның қаржылық көрсеткіштеріне, экономикалық жағдайына және актив құнына әсер ететін басқа да факторларға назар аударады. Бұл екі тәсілдің арасында бірнеше негізгі айырмашылық бар:

Техникалық талдаудың артықшылықтары мен кемшіліктері

Техникалық талдау нарыққа кіру және одан шығу үшін ықтимал қолайлы сәттерді анықтауға көмектеседі. Алайда фундаменталды талдаудан айырмашылығы, ол әдетте активтің ішкі құнын бағалауға арналмаған. Техникалық талдауға қатысты негізгі сынның бірі — тарихи баға үлгілері болашақта дәл сол қалпында қайталана бермейді. Сондықтан мұндай үлгілерді пайдалану нақты болжам жасауға кепілдік бермейді, ал олардың маңыздылығы нарық жағдайына қарай өзгеруі мүмкін. Төменде техникалық талдаудың негізгі артықшылықтары мен кемшіліктері келтірілген:

Қысқаша қорытынды

Техникалық талдау — баға мен сауда көлемі сияқты статистикалық деректерді зерттеу арқылы актив бағасының ықтимал қозғалысын бағалау және болжау әдісі.

Ол үш негізгі қағидаға сүйенеді: нарық барлық қолжетімді ақпаратты ескереді, баға белгілі бір тренд бағытымен қозғалады және баға үлгілері қайталануы мүмкін.

Техникалық талдаудың негізгі құралдары — графиктер мен индикаторлар. Графиктер баға мен сауда көлемі туралы деректерді көрнекі түрде көрсетеді, ал индикаторлар нарық динамикасын талдауға көмектеседі.

Техникалық және фундаменталды талдау — қаржы нарығын зерттеудің екі негізгі тәсілі. Техникалық талдау баға динамикасы мен нарық деректеріне назар аударса, фундаменталды талдау актив құнына әсер ететін қаржылық, экономикалық және басқа да факторларды қарастырады.

Техникалық талдау сауда шешімдерін жүйелеуге көмектесуі мүмкін, өйткені ол негізінен нарық деректері мен баға динамиғына сүйенеді. Дегенмен, ол субъективті түсіндірулерді толығымен жоймайды және болжамдардың объективті болуына кепілдік бермейді.

Техникалық талдау сауда шешімдерін жүйелеуге көмектескенімен, оның шектеулері бар. Индикаторлар күтілген нәтижеге әкелмейтін сигналдар көрсетуі мүмкін. Әсіресе, нарық жағдайы қолайсыз болғанда немесе айқын тренд болмағанда жалған сигналдар пайда болып, шығынға әкелетін мәмілелердің тәуекелін арттыруы мүмкін.